meray khwabon key jharookon ko sajani wali
teray khwabon mein kahin mera zikar hay key nahin?
pooch ker apni nigahon sey bata dey mujh ko
meri raton key muqadar mein sehar hay key nahin??

char din ki yeh rafaqat jo rafaqat bhi nahin
umar bhar key liye azar hui jati hay
zindagi youn tu hamesha sey pareshan si thi
ab tu har sans giran-bar hui jati hay

meri ujri hui neendon key shabistanon mein
tu kisi khwab key peykar ki tarah aye hay
kabhi apni si kabhi ghair nazar ati hay
kabhi ikhlas ki sorat kabhi harjai hay

pyar per bas tu nahin mera leikin phir bhi
tu bata key mein tujhey pyar keron ya na keroon
tu ney khud apnay tabasum sey jagaya hay jinhain
in tamanaon ka izhar keroon ya na keroon?

tu kisi or key daman ki kali hay leikin
meri ratain teri khushbo sey basi rehti hain
tu kahin bhi hoi teray phol sey aariz ki kasam
teri palkian meri nigahon per jhuki rehti hain

teray hathon ki hararat teray sanson ki mehak
teirti rehti hain ahsas ki pehnai mein
dhondti rehti hain takhaul ki banhain tujh ko
sard raton ki sulagti hui tanhai mein

tera andaz eik haqeeqat hay magar
yeh haqeeqat bhi haqeeqat mein fasana hi na ho
teri manoos nigahoon ka yeh muhtat peyam
dil key khoon kernay ka eik or bahana hi na ho

kon janay meray amroz ka farda kiya hay
qurbatain berh key pasheman bhi ho jati hain
dil key daman sey lipti hui rangeen nazrein
dekhtay hi deikhtay anjan bhi ho jati hain

Advertisements